Vástádus eana · The answer is land

Heime er der hjarta ditt er, heiter det. Men me kan like godt seia: Heime er der flokken din er.Ein kvar festival bør avslutta med ein smell. Ei framsyning som fangar deg på ein slik måte at du veit at her må du koma att. Osafestivalen 2022 avsluttar med ei framsyning som kjem til å sitja i hjarta og sjela di lenge.  Vástádus eana · The answer is land er ei framsyning av den samiske kunstnaren Elle Sofe Sara.

«Eg er oppteken av krafta som oppstår når me står saman. Kor mykje sterkare me er når me er del av ein fellesskap» seier den kunstnarlege leiaren og koreografen. Dei viktige tema i Vástádus eana · The answer is land er fellesskap og slektskap mellom menneske, med naturen og med jorda me alle deler.

Elle Sofe Sara har samla sju kvinner, sju kvinner frå ulik bakgrunn, med sine livsrøynsler, med sine historier, sine kroppar og sine stemmer. Slik går dei inn i verket, slik Elle Sofe ynskjer dei skal. Ho er oppteken av meininga som ligg i kvar rørsle, kvart blikk, i timing, retning, intensitet og i det å vera tilstades i augneblinken. Koreografien til Elle Sofe er inspirert at demonstrasjonar, samisk åndeleg praksis og formasjonsdans. Klima- og miljøkampen er òg ein del av dette.

Den fleirstemte joiken er eit berande element i framsyninga, og den meisterlege komponisten og musikaren Frode Fjellheim har spesialskrive denne joiken for Vástáduseana · The answer is land. Og her syner meister Fjellheim til fulle breidda i joik, samstundes som han utvidar definisjonen av kva den samiske tradisjonsmusikken kan vera.